Faire Meed ansteed vun Rendiet
En betahlbore Wahnen is de Grundlaag för en goot Leven. Wenn junge Minschen uttrecken köönt un öllere nich wegtrecken mööt, wasst Naverschop un Gemeenschop. Wahnen mütt dat Gemeenwoll denen un nich de Rendiet.
Mit de lannsegen Sellschop för Wahnensbo WohnRaum Niedersachsen korrigeert wi Fehlers ut fröhere Privatiserens. Wi vergeevt kommunale Flachen nich na den Hööchstpries, man na dat beste Konzept. In ne‘e Quarteren sekert wi tominnst 30 Perzent betahlboren Wahnruum. Wi wennt spekulativen Leddigstand af un sett de Medenbrems üm. Wenn wi gemeensam dorför sorgen doot, dat elkeen en seker Tohuus finnen deit, maakt wi dat Leven för uns all lichter.
De Natur bruukt uns Schuul
Un wi bruukt de Natur! Stell di vör: Summen Wischen, klore Beken un Bööm, de Schadden geevt, direktemang vör dien Huusdöör. Wi haalt de Natur torüch in uns Öörd. Wi wüllt, dat Neddersassen en Land is, wo sik dat vun sülven versteiht. Dorför bewohrt wi uns Moren as natürliche Klimaschulers un geevt Strööm wedder mehr Ruum, üm dat Water in de Landschop to holen. Tohoop mit Landweert:schen bringt wi de Veelfoolt torüch op de Feller, reduzeert Pestiziden un sorgt för rein Water. Wo Natur verloren gahn is, maakt wi ne‘e Levensrüüm. Wenn uns Natur intakt is, schenkt se uns Verhalen un Sekerheit för tokamen Generatschonen.
Dat Klima redden
Gemeensam maakt wi uns Dörper un Städer klimastevig, dormit Starkregen nich to en Katastrooph warrt un de Sommer Pläseer un nich süük maakt. Dat Hittwarrn vun de Eer to begrenzen heet, de Energie, de wi bruukt, klook ut duersame Energien to decken – mit de Kraft vun Sünn un Wind. För uns höört Warms to de Vörsorg för de Allgemeenheit dorto. Wi sett op Feern- un Neegwarms, de vun kummunale Energieversorgers dragen warrt. Un dat mit Verlaat, betahlbor un in demokraatsche Hand. So maakt wi dat Familjen lichter, dormit nich jeedeen alleen besluten un investeren mütt. Bi Windkraft un Photovoltaik gellt för uns: Bedeligen ansteed vun Belasten. Kommünen un Börgerslüüd schüllt an de Anlagen bedeligt warrn, sodat de Weerttowass vör Oort blifft. So warrt ut de Klimaredden en echte Schangs för uns Neddersassen.
APNV bringt uns wieder
Utspannt ut dat Finster kieken, to en Podcast luustern un pünktlich ankamen. Funkschoneren Mobilität bedüüdt Freeheit. Se maakt dat mööglich, wat wi Fründ:innen drapen oder in‘t Swümmbad föhren köönt. Wenn de Bus ok avends föhrt, blievt wi mobil. Dat Düütschlandticket hett den APNV eenfacker un betahlborer maakt. Nu geiht dat dorüm, de Anbotten vör Oort so uttoboen, as een dat nödig hett. Sünnerlich op Land sett wi op smarte Shuttles un Sammeltaxis, de een per App bestellen kann. Wi verbinnt den Neegverkehr direktemang mit Bike- un Carsharing. Wi föddert en duerhaftig 9-Euro-Ticket vun‘n Bund un sett uns vör Oort dorför in, dat junge Minschen günstigere Anbotten kriegt, to‘n Bispell dör en Düütschlandticket för Schöler:schen. Un mit mehr Tempo 30 un goot utbote Radweeg sorgt wi för mehr Sekerheit för groot un lütt. Wenn op Mobilität Verlaat is, verbinnt wi Minschen un hoolt uns Öörd levig.
Ne‘e Energie för de Weertschop
Uns Bedrieven steekt vull plietsche Köpp mit Drift. Wi schalt nu den Turbo in för ehr duersame Spood un maakt Neddersassen to en Magnet för gode Ideen! Mit verne‘erbore Energie to siede Priesen, op de een sik verlaten kann, maakt wi uns Ünnernehmens stark un unafhangig vun fossile Importen. Wi föddert Technologien för de Tokumst, schaapt ne‘e Markten un garanteert so krisenfaste Arbeitsplätz. Wi hölpt uns Bedrieven bi de klimaneutrale Produkschoon, rüümt bürokraatsche Steen ut den Weg un boot digitale Infrastruktur op. Mit exzellente Billen un kloke Towannern treckt wi de besten Talenten an. Gemeensam sekert wi en duersam Wassdom, dat gode Arbeitsplätz opstellen un den Grundsteen vun uns Kommünen för de Tokumst leggen deit.
Moderne Scholen för all
Wi maakt uns Scholen to de spannensten Öörd vun uns Kommünen, wo Talenten opdeckt, föddert un Fründschoppen för‘t Leven slaten warrt! Wi stellt kreative, inklusive Lehröörd mit digitale Utstatten un inspireren Gebüden op. Wi maakt de fröhkindliche Billen mit qualifizeerte Optreckers:chen stark. Hand in Hand mit Verenen warrt ut uns Grundscholen levige Ganzdagsscholen. Mit starke Schoolsotschaalarbeiders:chen un ne‘e Integreerte Samtscholen föddert wi dat langere gemeensame Lehren, dat all mitnehmen deit. Wi investeert in Billen un Levensschangsen, bünnelt Ressourcen för inklusiev Lehren un starkt so uns Tosamenhoolt.
Jöögd in‘t Zentrum rücken
Uns Jöögd brüddelt vör Energie un scheniale Infäll. Kinner un junge Lüüd sünd nich man de Tokumst, se sünd dat Hier un Nu! Wi geevt jüm de Bühn un den Ruum, den se verdeent. Wi kre’eert apen Steden, an de se sik utspannt drapen un de Tiet free geneten köönt. Denn Kommüün is ok de Bank, op de junge Lüüd avends sitten doot. In Jöögdparlamenten un Jöögdrööd hebbt se dat Seggen un besluut mit, woans uns Städer un Dörper wiederdiegen schüllt. Demokratie mütt nich blots lehrt, man ok leevt warrn. Mit engageerte, aktive Jöögdarbeit un Streetwork sorgt wi dorför, dat elkeen Stütt un Stöön kriggt. Wenn wi junge Lüüd in den Middelpunkt haalt un jüm tohöört, denn sorgt wi för en goot Leven för all vör Oort – gemeensam.